《讀者投稿》
話說我陀第一胎既時候，99全個孕期都無點理我，亦無黎搵我，當時大家關係都ok，佢可能忙住番工搵錢同打牌，咁我自己在家休息都唔錯。
我老公一向同我姑9，即佢家姐相處唔黎（又係另一段故），生之前已經同99講除左4大長老外，謝絕其他親戚探訪，特別係姑9。點知有一晚99趁我老公無黎探我，走黎同我講話姑9同佢老公去緊醫院探我。我當時真係勁想喊，食完全餐已經好攰唔想見人，仲要一早講明唔想有人黎探我，99仲要俾佢個女黎，我真係好嬲好唔開心，佢非常唔尊重我。
到坐月仲大獲，我本身同自己媽媽住，坐月已經有呀媽幫手。當初諗住叫99黎幫手同個孫沖下涼，順便佢可以探下個孫，但問題係佢日日都黎，買埋餸，但佢成日唔識揀或者買d佢屋企食開既餸，完全唔岩我地食。有時唔知係咪買d平價菜，又爛又難食，我呀媽平日好節儉，都忍唔住要扔左佢。
咁都算，我以為佢日頭探完個孫就走啦，點知佢日日都賴死唔走，留喺我屋企過夜，真係人都顛。佢話驚我夜晚辛苦，所以留喺度幫手。但問題係，我餵人奶，我點都要夜晚起身自己埋身餵，每次呀b喊佢就一齊起身，然後望住我餵奶，都唔知佢幫到d咩手。然後又成日喺我度抱走呀b，當正係自己生咁，但剛生完bb真係想自己抱多d照顧多d個bb。其實佢出發點係好，但問題係佢一朝早要由我屋企過海返工，搞到好似佢好辛苦好偉大咁，但除左佢同呀b沖涼唔使我濕水外，實際上佢幫唔到我咩手。
我其實已經有d黑佢面，終於有一晚，我忍唔住。由於屋企細，佢黎過夜要訓我間房，實際上好阻住我同老公休息。有一晚11點，我喺房照顧緊呀b，佢自己喺廳訓左喺梳化，我老公返到黎見到99好似好慘咁，就走左黎鬧我，話我有無當過佢呀媽係99，俾佢就咁訓廳。我堅傷心，我生完情緒已經唔穩定，仲要講到我係衰人、不孝咁。終於，我同老公嘈左一輪。
其實我諗佢係想見多d個孫，所以死都唔肯走，佢亦無心要令我同老公嘈交既。但佢唔知咩叫「愈幫愈忙」同埋「好心做壞事」，佢做既所有野都唔問過人地，自己覺得岩、覺得係好就做，完全無尊重過我。佢想黎幫手，但最後令我坐月仲唔開心，仲辛苦，亦喊左好多次。
我依家第二胎，好快生，我諗起坐月會見到佢就驚。佢近來同老爺講，話我一直無講俾佢聽預產期係幾時，老爺問我做咩唔講俾99同佢聽。其實我陀左咁耐b，佢地都一直唔問我，我呀爸呀媽想知都係自己主動問我，我點記得同邊個講過！我一聽到老爺咁講，我堅嬲，做咩要背住我同老爺講，佢自己無口唔識問我架？
＃我的極品四大長老
Search